Opinión

¿Camisea yapamanta imaynapas?

2021-10-03
Por Noticias SER
coverFoto: PCM

Gas de Camiseapa contratun yapamanta qawariy munaymi, umalliq Guido Bellido chaynata twittertakama willarikurun, tukuy chaqwata qatarirachin, astawanqa kay rimaywan ichapas kay ruway munaymi apanman chay yacimiento nisqanta Estaduman kutichinapaq. Chay rimaykuna mana allin chaskisqachu kachkan sector empresarial nisqampi chaynallataq mana kamachikuqwan tupaqkunawan. Astawan hukmanyachikun suntur ukumpi llumpay pantay kaynin, chayman hinallataq Umalliq Castillo iskayta hina rimarin (chaypas Twittertakama…)

Ichaqa yapamanta rimanakuy munayqa kay gas de Camisea contratukuna apariqkunawan manam manchachikunchu, chaytam munachikura Umalliq Castillo campañapi primera chaynallataq segunda vuelta nisqampi. Llakichikunqa primer ministrupa imaynam kay suyupa qullqinmanta rimanakuyta utqayman chaynallataq llutanta apariy munayninmi, astawanqa Ministerio de Energía y Minas chaynallataq Perú Petro nisqanta qipapi saqirispa.

Yapamanta Camiseapa contratukuna qawariyninqa mantaqmi karachu “nisyu” munachikuychu. Ancha qawarisqam karqa kay munachikuy mana tupaq wakin candidatukunapipas Alfredo Barnechea (2011 watapi), Yonhy Lescanupas (2016watapi) utaq kunan kamachikuqpa yanapaqnimpas Verónika Mendoza, paypas munachikura kayta iskaynin kamachikuyman yaykuy munayninmpi. Allin rimanakuyman chayay munayqa kay lliw suyupaq gas haypawananchikpaq allinmi astawan, llalliman chay transición energética nisqanman yaykunanchikpaq, manachá mana allinqa kanmanchu, ichapas kachkanraqmi kay sistema amachaqkuna paykunaman hinaqa manas kanchu chay contrato ruwasqamanta aswan allinqa.

Primer ministrupa yanqa rimayninkunam markanhina rikurirun chaymi llakikuyqa kachkan. Belliduqa yachanñam kamachikuynin tumpallaña wichiykunampaq kasqanta, chaynallataq yachan imayna aslla rimayllanwan Umalliq Castilluta mana allinman churananta. Awqanakuqkunapa chawpimpi tarikunchik chaymi hayparirun sunturta, mastarikurun Perú Libre huñunakuyman chaynallataq lliw aparato público nisqanman, kunan aslla puririykunam kachkan qipa kamachikuqkunapa saqisqanwanmi. Primer ministrupa munaysapallaña chaynallataq Trumpa ayrin hina Twitterkama nisqanmanta waklanninmanqa, manam kanchu ima nisyu allin ruway munayqa.

Noticias SERpi yuyaymananiku gas de Camiseapa contratun yapamanta qawariyninqa allin kanqa kunan kamachikuy nisqanta qatipaspa, chaynallataq llaqtapaq allinnita maskaspa, astawan urin llaqtakunapaq. Manam allintachu ruwan primer ministro kay hatun ruwayta mana allin rimaykunaman churaspa chaynallataq atipakuy awqanakuyman, chaykamañataq suyunchin qapariywan mañakuchkan kay gobierno allin puririnampaq.

El Editorial de NoticiasSER es traducido por Enma Díaz